Deus, in adiutórium meum inténde.
Dómine, ad adiuvándum me festína.
Glória Patri et Fílio et Spirítui Sancto.
Sicut erat in princípio et nunc et semper et in sǽcula sæculórum. Amen. Allelúia.
HYMNUS
Quicúmque Christum quǽritis,
óculos in altum tóllite:
illic licébit vísere
signum perénnis glóriæ.
Hæc stella, quæ solis rotam
vincit decóre ac lúmine,
venísse terris núntiat
cum carne terréstri Deum.
En, Pérsici ex orbis sinu,
sol unde sumit iánuam,
cernunt períti intérpretes
regále vexíllum magi.
« Quis iste tantus — ínquiunt —
regnátor astris ímperans,
quem sic tremunt cæléstia,
cui lux et æthra insérviunt?
Illústre quiddam cérnimus
quod nésciat finem pati,
sublíme, celsum, intérminum,
antíquius cælo et chao.
Hic ille rex est géntium
populíque rex Iudáici,
promíssus Abrahæ patri
eiúsque in ævum sémini ».
Iesu, tibi sit glória,
qui te revélas géntibus,
cum Patre et almo Spíritu,
in sempitérna sǽcula. Amen.
PSALMODIA
Ant. 1 Apértis thesáuris suis, obtulérunt magi Dómino aurum, tus et myrrham, allelúia.
Deus, Deus meus es tu, *
ad te de luce vígilo.
Sitívit in te ánima mea, *
te desiderávit caro mea.
In terra desérta et árida et inaquósa, †
sic in sancto appárui tibi, *
ut vidérem virtútem tuam et glóriam tuam.
Quóniam mélior est misericórdia tua super vitas, *
lábia mea laudábunt te.
Sic benedícam te in vita mea *
et in nómine tuo levábo manus meas.
Sicut ádipe et pinguédine repleátur ánima mea, *
et lábiis exsultatiónis laudábit os meum.
Cum memor ero tui super stratum meum, *
in matutínis meditábor de te,
quia fuísti adiútor meus, *
et in velaménto alárum tuárum exsultábo.
Adhǽsit ánima mea post te, *
me suscépit déxtera tua.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Apértis thesáuris suis, obtulérunt magi Dómino aurum, tus et myrrham, allelúia.
Ant. 2 Mária et flúmina, benedícite Dómino; hymnum dícite, fontes, Dómino, allelúia.
Dan 3, 57-88. 56
Benedícite, ómnia ópera Dómini, Dómino, *
laudáte et superexaltáte eum in sǽcula.
Benedícite, cæli, Dómino, *
benedícite, ángeli Dómini, Dómino.
Benedícite, aquæ omnes, quæ super cælos sunt, Dómino, *
benedícat omnis virtus Dómino.
Benedícite, sol et luna, Dómino, *
benedícite, stellæ cæli, Dómino.
Benedícite, omnis imber et ros, Dómino, *
benedícite, omnes venti, Dómino.
Benedícite, ignis et æstus, Dómino, *
benedícite, frigus et æstus, Dómino.
Benedícite, rores et pruína, Dómino, *
benedícite, gelu et frigus, Dómino.
Benedícite, glácies et nives, Dómino, *
benedícite, noctes et dies, Dómino.
Benedícite, lux et ténebræ, Dómino, *
benedícite, fúlgura et nubes, Dómino.
Benedícat terra Dóminum, *
laudet et superexáltet eum in sǽcula.
Benedícite, montes et colles, Dómino, *
benedícite, univérsa germinántia in terra, Dómino.
Benedícite, mária et flúmina, Dómino, *
benedícite, fontes, Dómino.
Benedícite, cete et ómnia quæ movéntur in aquis, Dómino, *
benedícite, omnes vólucres cæli, Dómino.
Benedícite, omnes béstiæ et pécora, Dómino, *
benedícite, fílii hóminum, Dómino.
Bénedic, Israel, Dómino, *
laudáte et superexaltáte eum in sǽcula.
Benedícite, sacerdótes Dómini, Dómino, *
benedícite, servi Dómini, Dómino.
Benedícite, spíritus et ánimæ iustórum, Dómino, *
benedícite, sancti et húmiles corde, Dómino.
Benedícite, Ananía, Azaría, Mísael, Dómino, *
laudáte et superexaltáte eum in sǽcula.
Benedicámus Patrem et Fílium cum Sancto Spíritu; *
laudémus et superexaltémus eum in sǽcula.
Benedíctus es in firmaménto cæli *
et laudábilis et gloriósus in sǽcula.
In fine huius cantici non dicitur Glória Patri.
Ant. Mária et flúmina, benedícite Dómino; hymnum dícite, fontes, Dómino, allelúia.
Ant. 3 Venit lumen tuum, Ierúsalem, et glória Dómini super te orta est, et ambulábunt gentes in lúmine tuo, allelúia.
Cantáte Dómino cánticum novum; *
laus eius in ecclésia sanctórum.
Lætétur Israel in eo, qui fecit eum, *
et fílii Sion exsúltent in rege suo.
Laudent nomen eius in choro, *
in týmpano et cíthara psallant ei,
quia beneplácitum est Dómino in pópulo suo, *
et honorábit mansuétos in salúte.
Iúbilent sancti in glória, *
læténtur in cubílibus suis.
Exaltatiónes Dei in gútture eórum *
et gládii ancípites in mánibus eórum,
ad faciéndam vindíctam in natiónibus, *
castigatiónes in pópulis,
ad alligándos reges eórum in compédibus *
et nóbiles eórum in mánicis férreis,
ad faciéndum in eis iudícium conscríptum: *
glória hæc est ómnibus sanctis eius.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Venit lumen tuum, Ierúsalem, et glória Dómini super te orta est, et ambulábunt gentes in lúmine tuo, allelúia.
LECTIO BREVIS
Is 52, 7-10
Quam pulchri super montes pedes annuntiántis, prædicántis pacem, annuntiántis bonum, prædicántis salútem, dicéntis Sion: « Regnávit Deus tuus! ». Vox speculatórum tuórum: levavérunt vocem, simul exsultábunt, quia óculo ad óculum vidébunt, cum redíerit Dóminus ad Sion. Gaudéte et exsultáte simul, desérta Ierúsalem, quia consolátus est Dóminus pópulum suum, redémit Ierúsalem. Nudávit Dóminus bráchium sanctum suum in óculis ómnium géntium; et vidébunt omnes fines terræ salutáre Dei nostri.
RESPONSORIUM BREVE
Adorábunt eum * Omnes reges terræ.
Adorábunt eum * Omnes reges terræ.
Omnes gentes sérvient ei.
Omnes reges terræ.
Glória Patri, et Fílio, et Spirítui Sancto.
Adorábunt eum * Omnes reges terræ.
CANTICUM EVANGELICUM
Ad Benedictus, ant. Hódie cælésti sponso iuncta est Ecclésia, quóniam in Iordáne lavit Christus eius crímina; currunt cum munéribus magi ad regáles núptias; et ex aqua facta vino lætántur convívæ, allelúia.
Lc 1, 68-79
Benedíctus Dóminus Deus Israel, *
quia visitávit et fecit redemptiónem plebi suæ
et eréxit cornu salútis nobis *
in domo David púeri sui,
sicut locútus est per os sanctórum, *
qui a sǽculo sunt, prophetárum eius,
salútem ex inimícis nostris *
et de manu ómnium, qui odérunt nos;
ad faciéndam misericórdiam cum pátribus nostris *
et memorári testaménti sui sancti,
iusiurándum, quod iurávit ad Abraham patrem nostrum, *
datúrum se nobis,
ut sine timóre, de manu inimicórum liberáti, *
serviámus illi
in sanctitáte et iustítia coram ipso *
ómnibus diébus nostris.
Et tu, puer, prophéta Altíssimi vocáberis: *
præíbis enim ante fáciem Dómini paráre vias eius,
ad dandam sciéntiam salútis plebi eius *
in remissiónem peccatórum eórum,
per víscera misericórdiæ Dei nostri, *
in quibus visitábit nos óriens ex alto,
illumináre his, qui in ténebris et in umbra mortis sedent *
ad dirigéndos pedes nostros in viam pacis.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ad Benedictus, ant. Hódie cælésti sponso iuncta est Ecclésia, quóniam in Iordáne lavit Christus eius crímina; currunt cum munéribus magi ad regáles núptias; et ex aqua facta vino lætántur convívæ, allelúia.
PRECES
Salvatórem nostrum, qui hódie a magis adorátus est, magno cum gáudio venerémur, acclamántes:
Lumen de lúmine, hunc diem illúmina.
Christe, qui manifestátus es in carne,
nos per verbum Dei et oratiónem sanctífica.
Lumen de lúmine, hunc diem illúmina.
Christe, qui iustificátus es in Spíritu,
líbera vitam nostram a spirítibus erróris.
Lumen de lúmine, hunc diem illúmina.
Christe, qui apparuísti ángelis,
fac ut gáudium cæli in terra percipiámus.
Lumen de lúmine, hunc diem illúmina.
Christe, qui prædicátus es géntibus,
áperi corda hóminum virtúte Spíritus Sancti.
Lumen de lúmine, hunc diem illúmina.
Christe, qui créditus es in mundo,
credéntium ómnium rénova fidem.
Lumen de lúmine, hunc diem illúmina.
Christe, qui assúmptus es in glória,
accénde in nobis desidérium regni tui.
Lumen de lúmine, hunc diem illúmina.
Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.
ORATIO
Deus, qui hodiérna die Unigénitum tuum géntibus stella duce revelásti, concéde propítius, ut qui iam te ex fide cognóvimus, usque ad contemplándam spéciem tuæ celsitúdinis perducámur. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
Amen.
Absente sacerdote vel diacono, et in recitatione a solo, sic concluditur:
Dóminus nos benedícat,
et ab omni malo deféndat
et ad vitam perdúcat ætérnam.
Amen.
Text © LIBRERIA EDITRICE VATICANA.
© 1999-2024 J. Vidéky