Deus, in adiutórium meum inténde.
Dómine, ad adiuvándum me festína.
Glória Patri et Fílio et Spirítui Sancto.
Sicut erat in princípio et nunc et semper et in sǽcula sæculórum. Amen. Allelúia.
HYMNUS
Ad cenam Agni próvidi,
stolis salútis cándidi,
post tránsitum maris Rubri
Christo canámus príncipi.
Cuius corpus sanctíssimum
in ara crucis tórridum,
sed et cruórem róseum
gustándo, Deo vívimus.
Protécti paschæ véspero
a devastánte ángelo,
de Pharaónis áspero
sumus erépti império.
Iam pascha nostrum Christus est,
agnus occísus ínnocens;
sinceritátis ázyma
qui carnem suam óbtulit.
O vera, digna hóstia,
per quam frangúntur tártara,
captíva plebs redímitur,
reddúntur vitæ prǽmia!
Consúrgit Christus túmulo,
victor redit de bárathro,
tyránnum trudens vínculo
et paradísum réserans.
Esto perénne méntibus
paschále, Iesu, gáudium
et nos renátos grátiæ
tuis triúmphis ággrega.
Iesu, tibi sit glória,
qui morte victa prǽnites,
cum Patre et almo Spíritu,
in sempitérna sǽcula. Amen.
PSALMODIA
Ant. 1 Venérunt ad monuméntum María Magdaléne et áltera María vidére sepúlcrum, allelúia.
Dixit Dóminus Dómino meo: *
« Sede a dextris meis,
donec ponam inimícos tuos *
scabéllum pedum tuórum ».
Virgam poténtiæ tuæ emíttet Dóminus ex Sion: *
domináre in médio inimicórum tuórum.
Tecum principátus in die virtútis tuæ, †
in splendóribus sanctis, *
ex útero ante lucíferum génui te.
Iurávit Dóminus et non pænitébit eum: *
« Tu es sacérdos in ætérnum secúndum órdinem Melchísedech ».
Dóminus a dextris tuis, *
conquassábit in die iræ suæ reges.
De torrénte in via bibet, *
proptérea exaltábit caput.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Venérunt ad monuméntum María Magdaléne et áltera María vidére sepúlcrum, allelúia.
Ant. 2 Veníte, et vidéte locum ubi pósitus erat Dóminus, allelúia.
In éxitu Israel de Ægýpto, *
domus Iacob de pópulo bárbaro,
factus est Iuda sanctuárium eius, *
Israel potéstas eius.
Mare vidit et fugit, *
Iordánis convérsus est retrórsum;
montes saltavérunt ut aríetes, *
et colles sicut agni óvium.
Quid est tibi, mare, quod fugísti? *
Et tu, Iordánis, quia convérsus es retrórsum?
Montes, quod saltástis sicut aríetes, *
et colles, sicut agni óvium?
A fácie Dómini contremísce, terra, *
a fácie Dei Iacob,
qui convértit petram in stagna aquárum *
et sílicem in fontes aquárum.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Veníte, et vidéte locum ubi pósitus erat Dóminus, allelúia.
Ant. 3 Ait Iesus: Nolíte timére; ite, nuntiáte frátribus meis ut eant in Galilǽam; ibi me vidébitis, allelúia.
Sequens canticum dicitur cum Allelúia, prouti hic notatur, quando cum cantu profertur; in recitatione vero sufficit ut Allelúia dicatur in initio et fine uniuscuiusque strophæ.
Cf. Ap 19, 1-2. 5-7
Allelúia.
Salus et glória et virtus Deo nostro, *
(R. Allelúia.)
quia vera et iusta iudícia eius.
R. Allelúia (allelúia).
Allelúia.
Laudem dícite Deo nostro, omnes servi eius *
(R. Allelúia.)
et qui timétis eum, pusílli et magni!
R. Allelúia (allelúia).
Allelúia.
Quóniam regnávit Dóminus, Deus noster omnípotens. *
(R. Allelúia.)
Gaudeámus et exsultémus et demus glóriam ei.
R. Allelúia (allelúia).
Allelúia.
Quia venérunt núptiæ Agni, *
(R. Allelúia.)
et uxor eius præparávit se.
R. Allelúia (allelúia).
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Ait Iesus: Nolíte timére; ite, nuntiáte frátribus meis ut eant in Galilǽam; ibi me vidébitis, allelúia.
LECTIO BREVIS
1 Petr 3, 18. 21b-22
Christus semel pro peccátis passus est, iustus pro iniústis, ut vos addúceret ad Deum, mortificátus quidem carne, vivificátus autem Spíritu. Et vos nunc salvos facit, non carnis deposítio sórdium sed consciéntiæ bonæ rogátio in Deum, per resurrectiónem Iesu Christi, qui est in déxtera Dei, proféctus in cælum, subiéctis sibi ángelis et potestátibus et virtútibus.
RESPONSORIUM BREVE
Loco responsorii dicitur:
Hæc dies quam fecit Dóminus: exsultémus et lætémur in ea, allelúia.
Hæc dies quam fecit Dóminus: exsultémus et lætémur in ea, allelúia.
CANTICUM EVANGELICUM
Ad Magnificat, ant. Vidéte manus meas et pedes meos, quia ego ipse sum, allelúia.
Lc 1, 46-55
Magníficat *
ánima mea Dóminum,
et exsultávit spíritus meus *
in Deo salvatóre meo,
quia respéxit humilitátem ancíllæ suæ. *
Ecce enim ex hoc beátam me dicent omnes generatiónes,
quia fecit mihi magna, qui potens est, *
et sanctum nomen eius,
et misericórdia eius in progénies et progénies *
timéntibus eum.
Fecit poténtiam in bráchio suo, *
dispérsit supérbos mente cordis sui;
depósuit poténtes de sede *
et exaltávit húmiles;
esuriéntes implévit bonis *
et dívites dimísit inánes.
Suscépit Israel púerum suum, *
recordátus misericórdiæ,
sicut locútus est ad patres nostros, *
Abraham et sémini eius in sǽcula.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ad Magnificat, ant. Vidéte manus meas et pedes meos, quia ego ipse sum, allelúia.
PRECES
Christum, qui surréxit a mórtuis primítiæ dormiéntium, iubilántes collaudémus et orémus:
Qui surrexísti a mórtuis, exáudi nos.
Meménto, Christe, Ecclésiæ tuæ sanctæ, quam in Apostolórum fundaménto ædificásti et in fines orbis diffudísti,
et super omnes in te credéntes sit benedíctio tua.
Qui surrexísti a mórtuis, exáudi nos.
Tu, médice animárum corporúmque nostrórum,
vísita nos et salva nos tua pietáte.
Qui surrexísti a mórtuis, exáudi nos.
Infírmos súbleva atque confírma,
eósque ab ómnibus solve languóribus.
Qui surrexísti a mórtuis, exáudi nos.
Adiuva angóribus et oppressiónibus conféctos,
et inópia laborántes miserátus sústine.
Qui surrexísti a mórtuis, exáudi nos.
Qui, per crucem et resurrectiónem tuam, viam immortalitátis ómnibus reserásti,
frátribus nostris defúnctis regni tui gáudia concéde.
Qui surrexísti a mórtuis, exáudi nos.
Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.
ORATIO
Deus, qui diversitátem géntium in confessióne tui nóminis adunásti, da, ut renátis fonte baptísmatis una sit fides méntium et píetas actiónum. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
Amen.
Absente sacerdote vel diacono, et in recitatione a solo, sic concluditur:
Dóminus nos benedícat,
et ab omni malo deféndat
et ad vitam perdúcat ætérnam.
Amen.
Text © LIBRERIA EDITRICE VATICANA.
© 1999-2024 J. Vidéky