Deus, in adiutórium meum inténde.
Dómine, ad adiuvándum me festína.
Glória Patri et Fílio et Spirítui Sancto.
Sicut erat in princípio et nunc et semper et in sǽcula sæculórum. Amen. Allelúia.
HYMNUS
Ad cenam Agni próvidi,
stolis salútis cándidi,
post tránsitum maris Rubri
Christo canámus príncipi.
Cuius corpus sanctíssimum
in ara crucis tórridum,
sed et cruórem róseum
gustándo, Deo vívimus.
Protécti paschæ véspero
a devastánte ángelo,
de Pharaónis áspero
sumus erépti império.
Iam pascha nostrum Christus est,
agnus occísus ínnocens;
sinceritátis ázyma
qui carnem suam óbtulit.
O vera, digna hóstia,
per quam frangúntur tártara,
captíva plebs redímitur,
reddúntur vitæ prǽmia!
Consúrgit Christus túmulo,
victor redit de bárathro,
tyránnum trudens vínculo
et paradísum réserans.
Esto perénne méntibus
paschále, Iesu, gáudium
et nos renátos grátiæ
tuis triúmphis ággrega.
Iesu, tibi sit glória,
qui morte victa prǽnites,
cum Patre et almo Spíritu,
in sempitérna sǽcula. Amen.
Vel ad libitum in feriis post octavam Paschæ:
O rex ætérne, Dómine,
semper cum Patre Fílius,
iuxta tuam imáginem
Adam plasmásti hóminem.
Quem diábolus decéperat
hostis humáni géneris,
eius et formam córporis
sumpsísti tu de Vírgine,
Ut nos Deo coniúngeres
per carnis contubérnium,
datúrus in baptísmate,
Redémptor, indulgéntiam.
Tu crucem propter hóminem
suscípere dignátus es;
dedísti tuum sánguinem
nostræ salútis prétium.
Tu surrexísti, glóriam
a Patre sumens débitam;
per te et nos resúrgere
devóta mente crédimus.
Esto perénne méntibus
paschále, Iesu, gáudium,
et nos renátos grátiæ
tuis triúmphis ággrega.
Iesu, tibi sit glória,
qui morte victa prǽnites,
cum Patre et almo Spíritu,
in sempitérna sǽcula. Amen.
PSALMODIA
Ant. 1 Si quis in Christo, nova creatúra, allelúia.
Confitémini Dómino, quóniam bonus, *
quóniam in ætérnum misericórdia eius.
Confitémini Deo deórum, *
quóniam in ætérnum misericórdia eius.
Confitémini Dómino dominórum, *
quóniam in ætérnum misericórdia eius.
Qui facit mirabília magna solus, *
quóniam in ætérnum misericórdia eius.
Qui fecit cælos in intelléctu, *
quóniam in ætérnum misericórdia eius.
Qui expándit terram super aquas, *
quóniam in ætérnum misericórdia eius.
Qui fecit luminária magna, *
quóniam in ætérnum misericórdia eius;
solem, ut præésset diéi, *
quóniam in ætérnum misericórdia eius;
lunam et stellas, ut præéssent nocti, *
quóniam in ætérnum misericórdia eius.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Si quis in Christo, nova creatúra, allelúia.
Ant. 2 Nos diligámus Deum, quóniam ipse prior diléxit nos, allelúia.
Qui percússit Ægýptum in primogénitis eórum, *
quóniam in ætérnum misericórdia eius.
Qui edúxit Israel de médio eórum, *
quóniam in ætérnum misericórdia eius;
in manu poténti et bráchio exténto, *
quóniam in ætérnum misericórdia eius.
Qui divísit mare Rubrum in divisiónes, *
quóniam in ætérnum misericórdia eius.
Et tradúxit Israel per médium eius, *
quóniam in ætérnum misericórdia eius.
Et excússit pharaónem et virtútem eius in mari Rubro, *
quóniam in ætérnum misericórdia eius.
Qui tradúxit pópulum suum per desértum, *
quóniam in ætérnum misericórdia eius.
Qui percússit reges magnos, *
quóniam in ætérnum misericórdia eius.
et occídit reges poténtes, *
quóniam in ætérnum misericórdia eius.
Sehon regem Amorræórum, *
quóniam in ætérnum misericórdia eius;
et Og regem Basan, *
quóniam in ætérnum misericórdia eius.
Et dedit terram eórum hereditátem, *
quóniam in ætérnum misericórdia eius;
hereditátem Israel servo suo, *
quóniam in ætérnum misericórdia eius.
Qui in humilitáte nostra memor fuit nostri, *
quóniam in ætérnum misericórdia eius.
et redémit nos ab inimícis nostris, *
quóniam in ætérnum misericórdia eius.
Qui dat escam omni carni, *
quóniam in ætérnum misericórdia eius.
Confitémini Deo cæli, *
quóniam in ætérnum misericórdia eius.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Nos diligámus Deum, quóniam ipse prior diléxit nos, allelúia.
Ant. 3 De plenitúdine eius omnes nos accépimus, et grátiam pro grátia, allelúia.
Eph 1, 3-10
Benedíctus Deus et Pater Dómini nostri Iesu Christi, *
qui benedíxit nos in omni benedictióne spiritáli in cæléstibus in Christo,
sicut elégit nos in ipso ante mundi constitutiónem, †
ut essémus sancti et immaculáti *
in conspéctu eius in caritáte,
qui prædestinávit nos in adoptiónem filiórum †
per Iesum Christum in ipsum, *
secúndum beneplácitum voluntátis suæ,
in laudem glóriæ grátiæ suæ, *
in qua gratificávit nos in Dilécto,
in quo habémus redemptiónem per sánguinem eius, *
remissiónem peccatórum,
secúndum divítias grátiæ eius, †
qua superabundávit in nobis *
in omni sapiéntia et prudéntia,
notum fáciens nobis mystérium voluntátis suæ, *
secúndum beneplácitum eius,
quod propósuit in eo, *
in dispensatiónem plenitúdinis témporum:
recapituláre ómnia in Christo, *
quæ in cælis et quæ in terra.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. De plenitúdine eius omnes nos accépimus, et grátiam pro grátia, allelúia.
LECTIO BREVIS
Hebr 8, 1b-3a
Talem habémus pontíficem, qui consédit in déxtera throni Maiestátis in cælis, sanctórum miníster et tabernáculi veri, quod fixit Dóminus, non homo. Omnis enim póntifex ad offerénda múnera et hóstias constitúitur.
RESPONSORIUM BREVE
Gavísi sunt discípuli, * Allelúia, allelúia.
Gavísi sunt discípuli, * Allelúia, allelúia.
Viso Dómino.
Allelúia, allelúia.
Glória Patri, et Fílio, et Spirítui Sancto.
Gavísi sunt discípuli, * Allelúia, allelúia.
CANTICUM EVANGELICUM
Ad Magnificat, ant. Alias oves hábeo, quæ non sunt ex hoc ovíli; et illas opórtet me addúcere, et vocem meam áudient, et fiet unum ovíle et unus pastor, allelúia.
Lc 1, 46-55
Magníficat *
ánima mea Dóminum,
et exsultávit spíritus meus *
in Deo salvatóre meo,
quia respéxit humilitátem ancíllæ suæ. *
Ecce enim ex hoc beátam me dicent omnes generatiónes,
quia fecit mihi magna, qui potens est, *
et sanctum nomen eius,
et misericórdia eius in progénies et progénies *
timéntibus eum.
Fecit poténtiam in bráchio suo, *
dispérsit supérbos mente cordis sui;
depósuit poténtes de sede *
et exaltávit húmiles;
esuriéntes implévit bonis *
et dívites dimísit inánes.
Suscépit Israel púerum suum, *
recordátus misericórdiæ,
sicut locútus est ad patres nostros, *
Abraham et sémini eius in sǽcula.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ad Magnificat, ant. Alias oves hábeo, quæ non sunt ex hoc ovíli; et illas opórtet me addúcere, et vocem meam áudient, et fiet unum ovíle et unus pastor, allelúia.
PRECES
Christum Dóminum, qui per resurrectiónem suam mundum clarificávit, lætánter deprecémur:
Christe, vita nostra, exáudi nos.
Dómine Iesu Christe, qui discípulis te cómitem adiunxísti in via,
adésto Ecclésiæ tuæ peregrinánti.
Christe, vita nostra, exáudi nos.
Ne patiáris fidéles tuos tardos esse ad credéndum,
sed fac ut te mortis victórem confiteántur.
Christe, vita nostra, exáudi nos.
Réspice benígnus eos, qui te in via non agnovérunt,
et manifésta teípsum, ut te salvatórem suscípiant.
Christe, vita nostra, exáudi nos.
Tu, qui per crucem omnes hómines reconciliásti in córpore tuo,
pacem et unitátem tríbue géntibus univérsis.
Christe, vita nostra, exáudi nos.
Iudex vivórum et mortuórum,
defúnctis, qui in te credidérunt, remissiónem peccatórum concéde.
Christe, vita nostra, exáudi nos.
Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.
ORATIO
Deus, qui in Fílii tui humilitáte iacéntem mundum erexísti, fidélibus tuis sanctam concéde lætítiam, ut, quos eripuísti a servitúte peccáti, gáudiis fácias pérfrui sempitérnis. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
Amen.
Absente sacerdote vel diacono, et in recitatione a solo, sic concluditur:
Dóminus nos benedícat,
et ab omni malo deféndat
et ad vitam perdúcat ætérnam.
Amen.
Text © LIBRERIA EDITRICE VATICANA.
© 1999-2024 J. Vidéky