Deus, in adiutórium meum inténde.
Dómine, ad adiuvándum me festína.
Glória Patri et Fílio et Spirítui Sancto.
Sicut erat in princípio et nunc et semper et in sǽcula sæculórum. Amen. Allelúia.
HYMNUS
Optátus votis ómnium
sacrátus illúxit dies,
quo Christus, mundi spes, Deus,
conscéndit cælos árduos.
Magni triúmphum prœ́lii,
mundi perémpto príncipe,
Patris præséntans vúltibus
victrícis carnis glóriam.
In nube fertur lúcida
et spem facit credéntibus,
iam paradísum réserans
quem protoplásti cláuserant.
O grande cunctis gáudium,
quod partus nostræ Vírginis,
post sputa, flagra, post crucem
patérnæ sedi iúngitur.
Agámus ergo grátias
nostræ salútis víndici,
nostrum quod corpus véxerit
sublíme ad cæli régiam.
Sit nobis cum cæléstibus
commúne manens gáudium:
illis, quod semet óbtulit,
nobis, quod se non ábstulit.
Nunc, Christe, scandens ǽthera
ad te cor nostrum súbleva,
tuum Patrísque Spíritum
emíttens nobis cǽlitus. Amen.
PSALMODIA
Ant. 1 Dóminus regnávit, decórem indútus est, allelúia. †
Dóminus regnávit! Decórem indútus est; *
† indútus est Dóminus, fortitúdine præcínxit se.
Etenim firmávit orbem terræ, *
qui non commovébitur.
Firmáta sedes tua ex tunc, *
a sǽculo tu es.
Elevavérunt flúmina, Dómine, †
elevavérunt flúmina vocem suam, *
elevavérunt flúmina fragórem suum.
Super voces aquárum multárum, †
super poténtes elatiónes maris, *
potens in altis Dóminus.
Testimónia tua credibília facta sunt nimis; *
domum tuam decet sanctitúdo, Dómine, in longitúdinem diérum.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Dóminus regnávit, decórem indútus est, allelúia.
Ant. 2 Liberábitur creatúra in libertátem glóriæ filiórum Dei, allelúia.
Dan 3, 57-88. 56
Benedícite, ómnia ópera Dómini, Dómino, *
laudáte et superexaltáte eum in sǽcula.
Benedícite, cæli, Dómino, *
benedícite, ángeli Dómini, Dómino.
Benedícite, aquæ omnes, quæ super cælos sunt, Dómino, *
benedícat omnis virtus Dómino.
Benedícite, sol et luna, Dómino, *
benedícite, stellæ cæli, Dómino.
Benedícite, omnis imber et ros, Dómino, *
benedícite, omnes venti, Dómino.
Benedícite, ignis et æstus, Dómino, *
benedícite, frigus et æstus, Dómino.
Benedícite, rores et pruína, Dómino, *
benedícite, gelu et frigus, Dómino.
Benedícite, glácies et nives, Dómino, *
benedícite, noctes et dies, Dómino.
Benedícite, lux et ténebræ, Dómino, *
benedícite, fúlgura et nubes, Dómino.
Benedícat terra Dóminum, *
laudet et superexáltet eum in sǽcula.
Benedícite, montes et colles, Dómino, *
benedícite, univérsa germinántia in terra, Dómino.
Benedícite, mária et flúmina, Dómino, *
benedícite, fontes, Dómino.
Benedícite, cete et ómnia quæ movéntur in aquis, Dómino, *
benedícite, omnes vólucres cæli, Dómino.
Benedícite, omnes béstiæ et pécora, Dómino, *
benedícite, fílii hóminum, Dómino.
Bénedic, Israel, Dómino, *
laudáte et superexaltáte eum in sǽcula.
Benedícite, sacerdótes Dómini, Dómino, *
benedícite, servi Dómini, Dómino.
Benedícite, spíritus et ánimæ iustórum, Dómino, *
benedícite, sancti et húmiles corde, Dómino.
Benedícite, Ananía, Azaría, Mísael, Dómino, *
laudáte et superexaltáte eum in sǽcula.
Benedicámus Patrem et Fílium cum Sancto Spíritu; *
laudémus et superexaltémus eum in sǽcula.
Benedíctus es in firmaménto cæli *
et laudábilis et gloriósus in sǽcula.
In fine huius cantici non dicitur Glória Patri.
Ant. Liberábitur creatúra in libertátem glóriæ filiórum Dei, allelúia.
Ant. 3 Exaltátum est nomen Dómini super cælum et terram, allelúia.
Laudáte Dóminum de cælis, *
laudáte eum in excélsis.
Laudáte eum, omnes ángeli eius, *
laudáte eum, omnes virtútes eius.
Laudáte eum, sol et luna, *
laudáte eum, omnes stellæ lucéntes.
Laudáte eum, cæli cælórum, *
et aquæ omnes, quæ super cælos sunt.
Laudent nomen Dómini, *
quia ipse mandávit, et creáta sunt;
státuit ea in ætérnum et in sǽculum sǽculi *
præcéptum pósuit, et non præteríbit.
Laudáte Dóminum de terra, *
dracónes et omnes abýssi,
ignis, grando, nix, fumus, *
spíritus procellárum, qui facit verbum eius,
montes et omnes colles, *
ligna fructífera et omnes cedri,
béstiæ et univérsa pécora, *
serpéntes et vólucres pennátæ.
Reges terræ et omnes pópuli, *
príncipes et omnes iúdices terræ,
iúvenes et vírgines, *
senes cum iunióribus,
laudent nomen Dómini, *
quia exaltátum est nomen eius solíus.
Magnificéntia eius super cælum et terram, *
et exaltávit cornu pópuli sui.
Hymnus ómnibus sanctis eius, *
fíliis Israel, pópulo, qui propínquus est ei.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Exaltátum est nomen Dómini super cælum et terram, allelúia.
LECTIO BREVIS
Act 10, 40-43
Deus suscitávit Iesum tértia die et dedit eum maniféstum fíeri, non omni pópulo sed téstibus præordinátis a Deo, nobis, qui manducávimus et bíbimus cum illo postquam resurréxit a mórtuis; et præcépit nobis prædicáre pópulo et testificári quia ipse est, qui constitútus est a Deo iudex vivórum et mortuórum. Huic omnes prophétæ testimónium pérhibent remissiónem peccatórum accípere per nomen eius omnes, qui credunt in eum.
RESPONSORIUM BREVE
Christe, Fili Dei vivi, miserére nobis. * Allelúia, allelúia.
Christe, Fili Dei vivi, miserére nobis. * Allelúia, allelúia.
Qui surrexísti a mórtuis.
Allelúia, allelúia.
Glória Patri, et Fílio, et Spirítui Sancto.
Christe, Fili Dei vivi, miserére nobis. * Allelúia, allelúia.
CANTICUM EVANGELICUM
Ad Benedictus, ant. Ego claritátem quam dedísti mihi, dedi illis, ut sint unum sicut nos unum sumus, allelúia.
Lc 1, 68-79
Benedíctus Dóminus Deus Israel, *
quia visitávit et fecit redemptiónem plebi suæ
et eréxit cornu salútis nobis *
in domo David púeri sui,
sicut locútus est per os sanctórum, *
qui a sǽculo sunt, prophetárum eius,
salútem ex inimícis nostris *
et de manu ómnium, qui odérunt nos;
ad faciéndam misericórdiam cum pátribus nostris *
et memorári testaménti sui sancti,
iusiurándum, quod iurávit ad Abraham patrem nostrum, *
datúrum se nobis,
ut sine timóre, de manu inimicórum liberáti, *
serviámus illi
in sanctitáte et iustítia coram ipso *
ómnibus diébus nostris.
Et tu, puer, prophéta Altíssimi vocáberis: *
præíbis enim ante fáciem Dómini paráre vias eius,
ad dandam sciéntiam salútis plebi eius *
in remissiónem peccatórum eórum,
per víscera misericórdiæ Dei nostri, *
in quibus visitábit nos óriens ex alto,
illumináre his, qui in ténebris et in umbra mortis sedent *
ad dirigéndos pedes nostros in viam pacis.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ad Benedictus, ant. Ego claritátem quam dedísti mihi, dedi illis, ut sint unum sicut nos unum sumus, allelúia.
PRECES
Cum ómnibus, qui in Spíritu Dei iustificáti sunt, nos in láudibus et oratióne coniungámus, dicéntes:
Spíritus tuus ádiuvet nos.
Dómine Iesu, da ut hódie a Spíritu Dei agámur,
et semper ut fílii Dei ambulémus.
Spíritus tuus ádiuvet nos.
Per Spíritum tuum a Patre efflágita,
ut digni efficiámur promissiónibus tuis.
Spíritus tuus ádiuvet nos.
Redde nos magnánimos, ne quærámus quod nostrum est,
sed aliórum bonum pótius intendámus.
Spíritus tuus ádiuvet nos.
Da nobis sciéntiam Dei,
ut in cognitióne tui ac Patris per Spíritum Sanctum progrediámur.
Spíritus tuus ádiuvet nos.
Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.
ORATIO
Supplicatiónibus nostris, Dómine, adésto propítius, ut, sicut humáni géneris Salvatórem tecum in tua crédimus maiestáte, ita usque ad consummatiónem sǽculi manére nobíscum, sicut ipse promísit, sentiámus. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
Amen.
Absente sacerdote vel diacono, et in recitatione a solo, sic concluditur:
Dóminus nos benedícat,
et ab omni malo deféndat
et ad vitam perdúcat ætérnam.
Amen.
Text © LIBRERIA EDITRICE VATICANA.
© 1999-2024 J. Vidéky