Tertia
Deus, in adiutórium meum inténde.
Dómine, ad adiuvándum me festína.
Glória Patri et Fílio et Spirítui Sancto.
Sicut erat in princípio et nunc et semper et in sǽcula sæculórum. Amen. Allelúia.
HYMNUS
Nunc, Sancte, nobis, Spíritus
unum Patri cum Fílio,
dignáre promptus íngeri
nostro refúsus péctori.
Os, lingua, mens, sensus, vigor
confessiónem pérsonent,
flamméscat igne cáritas,
accéndat ardor próximos.
Per te sciámus da Patrem
noscámus atque Fílium,
te utriúsque Spíritum
credámus omni témpore. Amen.
Vel:
Certum tenéntes órdinem,
pio poscámus péctore
hora diéi tértia
trinæ virtútis glóriam,
Ut simus habitáculum
illi Sancto Spirítui,
qui quondam in apóstolis
hac hora distribútus est.
Hoc gradiénte órdine,
ornávit cuncta spléndide
regni cæléstis cónditor
ad nostra ætérna prǽmia.
Deo Patri sit glória
eiúsque soli Fílio
cum Spíritu Paráclito,
in sempitérna sǽcula. Amen.
PSALMODIA
Ant. 1 De tribulatióne invocávi Dóminum, et exaudívit me, allelúia.
Confitémini Dómino, quóniam bonus, *
quóniam in sǽculum misericórdia eius.
Dicat nunc Israel, quóniam bonus, *
quóniam in sǽculum misericórdia eius.
Dicat nunc domus Aaron, *
quóniam in sǽculum misericórdia eius.
Dicant nunc, qui timent Dóminum, *
quóniam in sǽculum misericórdia eius.
De tribulatióne invocávi Dóminum, *
et exaudívit me edúcens in latitúdinem Dóminus.
Dóminus mecum, *
non timébo, quid fáciat mihi homo.
Dóminus mecum adiútor meus, *
et ego despíciam inimícos meos.
Bonum est confúgere ad Dóminum *
quam confídere in hómine.
Bonum est confúgere ad Dóminum *
quam confídere in princípibus.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. De tribulatióne invocávi Dóminum, et exaudívit me, allelúia.
Ant. 2 Déxtera Dómini exaltávit me, allelúia.
Omnes gentes circuiérunt me, *
et in nómine Dómini excídi eos.
Circumdántes circumdedérunt me, *
et in nómine Dómini excídi eos.
Circumdedérunt me sicut apes †
et exarsérunt sicut ignis in spinis, *
et in nómine Dómini excídi eos.
Impelléntes impulérunt me, ut cáderem, *
et Dóminus adiúvit me.
Fortitúdo mea et laus mea Dóminus *
et factus est mihi in salútem.
Vox iubilatiónis et salútis *
in tabernáculis iustórum:
« Déxtera Dómini fecit virtútem! †
Déxtera Dómini exaltávit me; *
déxtera Dómini fecit virtútem! »
Non móriar, sed vivam *
et narrábo ópera Dómini.
Castígans castigávit me Dóminus *
et morti non trádidit me.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Déxtera Dómini exaltávit me, allelúia.
Ant. 3 Deus Dóminus illúxit nobis, allelúia.
Aperíte mihi portas iustítiæ; *
ingréssus in eas confitébor Dómino.
Hæc porta Dómini; *
iusti intrábunt in eam.
Confitébor tibi, quóniam exaudísti me *
et factus es mihi in salútem.
Lápidem, quem reprobavérunt ædificántes, *
hic factus est in caput ánguli;
a Dómino factum est istud *
et est mirábile in óculis nostris.
Hæc est dies, quam fecit Dóminus: *
exsultémus et lætémur in ea.
O Dómine, salvum me fac; *
o Dómine, da prosperitátem!
Benedíctus, qui venit in nómine Dómini. *
Benedícimus vobis de domo Dómini.
Deus Dóminus et illúxit nobis. *
Instrúite sollemnitátem in ramis condénsis usque ad córnua altáris.
Deus meus es tu, et confitébor tibi, *
Deus meus, et exaltábo te.
Confitémini Dómino, quóniam bonus, *
quóniam in sǽculum misericórdia eius.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Deus Dóminus illúxit nobis, allelúia.
LECTIO BREVIS
Rom 8, 15-16
Non accepístis spíritum servitútis íterum in timórem, sed accepístis Spíritum adoptiónis filiórum, in quo clamámus: Abba, Pater! Ipse Spíritus testimónium reddit una cum spíritu nostro quod sumus fílii Dei.
Apud te, Dómine, est fons vitæ.
Et in lúmine tuo vidébimus lumen.
ORATIO
Orémus.
Omnípotens et miséricors Deus, de cuius múnere venit, ut tibi a fidélibus tuis digne et laudabíliter serviátur, tríbue, quǽsumus, nobis, ut ad promissiónes tuas sine offensióne currámus. Per Christum Dóminum nostrum.
Amen.
Deinde, saltem in celebratione communi, additur acclamatio:
Benedicámus Dómino.
Deo grátias.
Text © LIBRERIA EDITRICE VATICANA.
© 1999-2024 J. Vidéky