Veníte, exsultémus Dómino; *

iubilémus Deo salutári nostro.

Præoccupémus fáciem eius in confessióne *

et in psalmis iubilémus ei.

Ant. Confitémini Dómino, quia in ætérnum misericórdia eius.

Quóniam Deus magnus Dóminus, *

et rex magnus super omnes deos.

Quia in manu eius sunt profúnda terræ, *

et altitúdines móntium ipsíus sunt.

Quóniam ipsíus est mare, et ipse fecit illud, *

et siccam manus eius formavérunt.

Ant. Confitémini Dómino, quia in ætérnum misericórdia eius.

Veníte, adorémus et procidámus, *

et génua flectámus ante Dóminum, qui fecit nos,

quia ipse est Deus noster, *

et nos pópulus páscuæ eius et oves manus eius.

Ant. Confitémini Dómino, quia in ætérnum misericórdia eius.

Utinam hódie vocem eius audiátis: *

« Nolíte obduráre corda vestra,

sicut in Meríba secúndum diem Massa in desérto, †

ubi tentavérunt me patres vestri: *

probavérunt me, etsi vidérunt ópera mea.

Ant. Confitémini Dómino, quia in ætérnum misericórdia eius.

Quadragínta annis tǽduit me generatiónis illíus, *

et dixi: Pópulus errántium corde sunt isti.

Et ipsi non cognovérunt vias meas; †

ídeo iurávi in ira mea: *

Non introíbunt in réquiem meam ».

Ant. Confitémini Dómino, quia in ætérnum misericórdia eius.

Iubiláte Dómino, omnis terra, *

servíte Dómino in lætítia;

introíte in conspéctu eius *

in exsultatióne.

Ant. Confitémini Dómino, quia in ætérnum misericórdia eius.

Scitóte quóniam Dóminus ipse est Deus; †

ipse fecit nos, et ipsíus sumus, *

pópulus eius et oves páscuæ eius.

Ant. Confitémini Dómino, quia in ætérnum misericórdia eius.

Introíte portas eius in confessióne, †

átria eius in hymnis, *

confitémini illi, benedícite nómini eius.

Quóniam suávis est Dóminus; †

in ætérnum misericórdia eius, *

et usque in generatiónem et generatiónem véritas eius.

Ant. Confitémini Dómino, quia in ætérnum misericórdia eius.

Deus misereátur nostri et benedícat nobis; *

illúminet vultum suum super nos,

ut cognoscátur in terra via tua, *

in ómnibus géntibus salutáre tuum.

Ant. Confitémini Dómino, quia in ætérnum misericórdia eius.

Confiteántur tibi pópuli, Deus; *

confiteántur tibi pópuli omnes.

Læténtur et exsúltent gentes, †

quóniam iúdicas pópulos in æquitáte *

et gentes in terra dírigis.

Ant. Confitémini Dómino, quia in ætérnum misericórdia eius.

Confiteántur tibi pópuli, Deus, *

confiteántur tibi pópuli omnes.

Terra dedit fructum suum; *

benedícat nos Deus, Deus noster,

benedícat nos Deus, *

et métuant eum omnes fines terræ.

Ant. Confitémini Dómino, quia in ætérnum misericórdia eius.

Dómini est terra et plenitúdo eius, *

orbis terrárum et qui hábitant in eo.

Quia ipse super mária fundávit eum *

et super flúmina firmávit eum.

Ant. Confitémini Dómino, quia in ætérnum misericórdia eius.

Quis ascéndet in montem Dómini, *

aut quis stabit in loco sancto eius?

Innocens mánibus et mundo corde, †

qui non levávit ad vana ánimam suam, *

nec iurávit in dolum.

Hic accípiet benedictiónem a Dómino *

et iustificatiónem a Deo salutári suo.

Hæc est generátio quæréntium eum, *

quæréntium fáciem Dei Iacob.

Ant. Confitémini Dómino, quia in ætérnum misericórdia eius.

Attóllite, portæ, cápita vestra, †

et elevámini, portæ æternáles, *

et introíbit rex glóriæ.

Quis est iste rex glóriæ? *

Dóminus fortis et potens, Dóminus potens in prœ́lio.

Ant. Confitémini Dómino, quia in ætérnum misericórdia eius.

Attóllite, portæ, cápita vestra, †

et elevámini, portæ æternáles, *

et introíbit rex glóriæ.

Quis est iste rex glóriæ? *

Dóminus virtútum ipse est rex glóriæ.

Ant. Confitémini Dómino, quia in ætérnum misericórdia eius.