Deus, in adiutórium meum inténde.
Dómine, ad adiuvándum me festína.
Glória Patri et Fílio et Spirítui Sancto.
Sicut erat in princípio et nunc et semper et in sǽcula sæculórum. Amen. Allelúia.
HYMNUS
Te sæculórum príncipem,
te, Christe, regem géntium,
te méntium, te córdium
unum fatémur árbitrum.
Quem prona adórant ágmina
hymnísque laudant cǽlitum,
te nos ovántes ómnium
regem suprémum dícimus.
O Christe, princeps pácifer,
mentes rebélles súbice,
tuóque amóre dévios
ovíle in unum cóngrega.
Ad hoc cruénta ab árbore
pendes apértis brácchiis,
diráque fossum cúspide
cor igne flagrans éxhibes.
Ad hoc in aris ábderis
vini dapísque imágine,
fundens salútem fíliis
transverberáto péctore.
Iesu, tibi sit glória,
qui cuncta amóre témperas,
cum Patre et almo Spíritu
in sempitérna sǽcula. Amen.
PSALMODIA
Ant. 1 Pacíficus vocábitur, et thronus eius erit firmíssimus in perpétuum.
Laudáte, púeri Dómini, *
laudáte nomen Dómini.
Sit nomen Dómini benedíctum *
ex hoc nunc et usque in sǽculum.
A solis ortu usque ad occásum *
laudábile nomen Dómini.
Excélsus super omnes gentes Dóminus, *
super cælos glória eius.
Quis sicut Dóminus Deus noster, qui in altis hábitat *
et se inclínat, ut respíciat in cælum et in terram?
Súscitans de terra ínopem, *
de stércore érigens páuperem,
ut cóllocet eum cum princípibus, *
cum princípibus pópuli sui.
Qui habitáre facit stérilem in domo, *
matrem filiórum lætántem.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Pacíficus vocábitur, et thronus eius erit firmíssimus in perpétuum.
Ant. 2 Regnum eius regnum sempitérnum est, et omnes reges sérvient ei et obœ́dient.
Laudáte Dóminum, omnes gentes, *
collaudáte eum, omnes pópuli.
Quóniam confirmáta est super nos misericórdia eius, *
et véritas Dómini manet in ætérnum.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Regnum eius regnum sempitérnum est, et omnes reges sérvient ei et obœ́dient.
Ant. 3 Christo datus est principátus et honor regni; omnis pópulus, tribus et linguæ sérvient ei in ætérnum.
Ap 4, 11; 5, 9. 10. 12
Dignus es, Dómine et Deus noster, *
accípere glóriam et honórem et virtútem,
quia tu creásti ómnia, *
et propter voluntátem tuam erant et creáta sunt.
Dignus es, Dómine, accípere librum *
et aperíre signácula eius,
quóniam occísus es †
et redemísti Deo in sánguine tuo *
ex omni tribu et lingua et pópulo et natióne
et fecísti eos Deo nostro regnum et sacerdótes, *
et regnábunt super terram.
Dignus est Agnus, qui occísus est, †
accípere virtútem et divítias et sapiéntiam *
et fortitúdinem et honórem et glóriam et benedictiónem.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ant. Christo datus est principátus et honor regni; omnis pópulus, tribus et linguæ sérvient ei in ætérnum.
LECTIO BREVIS
Cf. Eph 1, 20-23
Deus suscitávit Christum a mórtuis et constítuit ad déxteram suam in cæléstibus supra omnem principátum et potestátem et virtútem et dominatiónem et omne nomen, quod nominátur, non solum in hoc sǽculo sed et in futúro; et ómnia subiécit sub pédibus eius, et ipsum dedit caput supra ómnia ecclésiæ, quæ est corpus ipsíus, plenitúdo eius, qui ómnia in ómnibus adimplétur.
RESPONSORIUM BREVE
Tua est magnificéntia et poténtia, * Tuum, Dómine, regnum.
Tua est magnificéntia et poténtia, * Tuum, Dómine, regnum.
Tu domináris ómnium.
Tuum, Dómine, regnum.
Glória Patri, et Fílio, et Spirítui Sancto.
Tua est magnificéntia et poténtia, * Tuum, Dómine, regnum.
CANTICUM EVANGELICUM
Ad Magnificat, ant. Dabit illi Dóminus Deus sedem David, patris eius; et regnábit in domo Iacob in ætérnum, et regni eius non erit finis, allelúia.
Lc 1, 46-55
Magníficat *
ánima mea Dóminum,
et exsultávit spíritus meus *
in Deo salvatóre meo,
quia respéxit humilitátem ancíllæ suæ. *
Ecce enim ex hoc beátam me dicent omnes generatiónes,
quia fecit mihi magna, qui potens est, *
et sanctum nomen eius,
et misericórdia eius in progénies et progénies *
timéntibus eum.
Fecit poténtiam in bráchio suo, *
dispérsit supérbos mente cordis sui;
depósuit poténtes de sede *
et exaltávit húmiles;
esuriéntes implévit bonis *
et dívites dimísit inánes.
Suscépit Israel púerum suum, *
recordátus misericórdiæ,
sicut locútus est ad patres nostros, *
Abraham et sémini eius in sǽcula.
Glória Patri et Fílio *
et Spirítui Sancto,
sicut erat in princípio et nunc et semper *
et in sǽcula sæculórum. Amen.
Ad Magnificat, ant. Dabit illi Dóminus Deus sedem David, patris eius; et regnábit in domo Iacob in ætérnum, et regni eius non erit finis, allelúia.
PRECES
Fratres, Christum regem, qui est ante ómnia et in quo ómnia constant, orémus clamántes:
Advéniat regnum tuum, Dómine.
Christe, rex et pastor noster, cóngrega oves tuas de cunctis terris,
et pasce eas in páscuis tuis viréntibus et ubérrimis.
Advéniat regnum tuum, Dómine.
Dux noster et salvátor, ædífica omnes in pópulum tuum; sana infírmos, requíre depérditos, fortes custódi,
longínquos révoca, dispérsos cóngrega, diffidéntes érige.
Advéniat regnum tuum, Dómine.
Iudex ætérne, cum tradíderis regnum tuum Deo Patri, pone nos a dextris tuis,
et fac ut possideámus regnum parátum nobis a constitutióne mundi.
Advéniat regnum tuum, Dómine.
Princeps pacis, díssipa arcus belli
et lóquere pacem tuam géntibus.
Advéniat regnum tuum, Dómine.
Heres ómnium géntium, cóngrega humanitátem cum ómnibus bonis eius in regnum Ecclésiæ tuæ, quod Pater dedit tibi,
ut te caput in unitáte Spíritus Sancti omnes agnóscant.
Advéniat regnum tuum, Dómine.
Christe, primogénite ex mórtuis et primítiæ dormiéntium,
admítte defúnctos in glóriam resurrectiónis tuæ.
Advéniat regnum tuum, Dómine.
Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.
ORATIO
Omnípotens sempitérne Deus, qui in dilécto Fílio tuo, universórum rege, ómnia instauráre voluísti, concéde propítius, ut tota creatúra, a servitúte liberáta, tuæ maiestáti desérviat ac te sine fine colláudet. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.
Amen.
Absente sacerdote vel diacono, et in recitatione a solo, sic concluditur:
Dóminus nos benedícat,
et ab omni malo deféndat
et ad vitam perdúcat ætérnam.
Amen.
Text © LIBRERIA EDITRICE VATICANA.
© 1999-2024 J. Vidéky