27. Decembris 2025

SANCTÆ FAMILIÆ IESU, MARIÆ ET IOSEPH
festum

I Vesperæ

Deus, in adiutórium meum inténde.

Dómine, ad adiuvándum me festína.

Glória Patri et Fílio et Spirítui Sancto.
Sicut erat in princípio et nunc et semper et in sǽcula sæculórum. Amen. Allelúia.

HYMNUS

O lux beáta cǽlitum

et summa spes mortálium,

Iesu, cui doméstica

arrísit orto cáritas;

María, dives grátia,

o sola quæ casto potes

fovére Iesum péctore,

cum lacte donans óscula;

Tuque ex vetústis pátribus

delécte custos Vírginis,

dulci patris quem nómine

divína Proles ínvocat:

De stirpe Iesse nóbili

nati in salútem géntium,

audíte nos, qui súpplices

ex corde vota fúndimus.

Qua vestra sedes flóruit

virtútis omnis grátia,

hanc detur in domésticis

reférre posse móribus.

Iesu, tuis obœ́diens

qui factus es paréntibus,

cum Patre summo ac Spíritu

semper tibi sit glória. Amen.

PSALMODIA

Ant. 1 Iacob autem génuit Ioseph virum Maríæ, de qua natus est Iesus, qui vocátur Christus.

Psalmus 112 (113)
Laudabile nomen Domini
Deposuit potentes de sede et exaltavit humiles (Lc 1, 52).

Laudáte, púeri Dómini, *

laudáte nomen Dómini.

Sit nomen Dómini benedíctum *

ex hoc nunc et usque in sǽculum.

A solis ortu usque ad occásum *

laudábile nomen Dómini.

Excélsus super omnes gentes Dóminus, *

super cælos glória eius.

Quis sicut Dóminus Deus noster, qui in altis hábitat *

et se inclínat, ut respíciat in cælum et in terram?

Súscitans de terra ínopem, *

de stércore érigens páuperem,

ut cóllocet eum cum princípibus, *

cum princípibus pópuli sui.

Qui habitáre facit stérilem in domo, *

matrem filiórum lætántem.

Glória Patri et Fílio *

et Spirítui Sancto,

sicut erat in princípio et nunc et semper *

et in sǽcula sæculórum. Amen.

Ant. Iacob autem génuit Ioseph virum Maríæ, de qua natus est Iesus, qui vocátur Christus.

Ant. 2 Ioseph, fili David, noli timére accípere Maríam cóniugem tuam; quod enim in ea natum est, de Spíritu Sancto est.

Psalmus 147 (147 B)
Instauratio Ierusalem
Veni, ostendam tibi sponsam uxorem Agni (Ap 21, 9).

Lauda, Ierúsalem, Dóminum; *

colláuda Deum tuum, Sion.

Quóniam confortávit seras portárum tuárum, *

benedíxit fíliis tuis in te.

Qui ponit fines tuos pacem *

et ádipe fruménti sátiat te.

Qui emíttit elóquium suum terræ, *

velóciter currit verbum eius.

Qui dat nivem sicut lanam, *

pruínam sicut cínerem spargit.

Mittit crystállum suam sicut buccéllas; *

ante fáciem frígoris eius quis sustinébit?

Emíttet verbum suum et liquefáciet ea, *

flabit spíritus eius, et fluent aquæ.

Qui annúntiat verbum suum Iacob, *

iustítias et iudícia sua Israel.

Non fecit táliter omni natióni, *

et iudícia sua non manifestávit eis.

Glória Patri et Fílio *

et Spirítui Sancto,

sicut erat in princípio et nunc et semper *

et in sǽcula sæculórum. Amen.

Ant. Ioseph, fili David, noli timére accípere Maríam cóniugem tuam; quod enim in ea natum est, de Spíritu Sancto est.

Ant. 3 Pastóres venérunt festinántes, et invenérunt Maríam et Ioseph et Infántem pósitum in præsépio.

Canticum
De Deo salvatore

Eph 1, 3-10

Benedíctus Deus et Pater Dómini nostri Iesu Christi, *

qui benedíxit nos in omni benedictióne spiritáli in cæléstibus in Christo,

sicut elégit nos in ipso ante mundi constitutiónem, †

ut essémus sancti et immaculáti *

in conspéctu eius in caritáte,

qui prædestinávit nos in adoptiónem filiórum †

per Iesum Christum in ipsum, *

secúndum beneplácitum voluntátis suæ,

in laudem glóriæ grátiæ suæ, *

in qua gratificávit nos in Dilécto,

in quo habémus redemptiónem per sánguinem eius, *

remissiónem peccatórum,

secúndum divítias grátiæ eius, †

qua superabundávit in nobis *

in omni sapiéntia et prudéntia,

notum fáciens nobis mystérium voluntátis suæ, *

secúndum beneplácitum eius,

quod propósuit in eo, *

in dispensatiónem plenitúdinis témporum:

recapituláre ómnia in Christo, *

quæ in cælis et quæ in terra.

Glória Patri et Fílio *

et Spirítui Sancto,

sicut erat in princípio et nunc et semper *

et in sǽcula sæculórum. Amen.

Ant. Pastóres venérunt festinántes, et invenérunt Maríam et Ioseph et Infántem pósitum in præsépio.

LECTIO BREVIS

2 Cor 8, 9

Scitis grátiam Dómini nostri Iesu Christi, quóniam propter vos egénus factus est, cum esset dives, ut illíus inópia vos dívites essétis.

RESPONSORIUM BREVE

Verbum caro factum est, * Et habitávit in nobis.

Verbum caro factum est, * Et habitávit in nobis.

Et de plenitúdine eius omnes nos accépimus.

Et habitávit in nobis.

Glória Patri, et Fílio, et Spirítui Sancto.

Verbum caro factum est, * Et habitávit in nobis.

CANTICUM EVANGELICUM

Ad Magnificat, ant. Ecce ángelus Dómini appáret in somnis Ioseph dicens: Surge et áccipe púerum et matrem eius et fuge in Ægýptum et esto ibi, usque dum dicam tibi.

Exsultatio animæ in Domino

Lc 1, 46-55

Magníficat *

ánima mea Dóminum,

et exsultávit spíritus meus *

in Deo salvatóre meo,

quia respéxit humilitátem ancíllæ suæ. *

Ecce enim ex hoc beátam me dicent omnes generatiónes,

quia fecit mihi magna, qui potens est, *

et sanctum nomen eius,

et misericórdia eius in progénies et progénies *

timéntibus eum.

Fecit poténtiam in bráchio suo, *

dispérsit supérbos mente cordis sui;

depósuit poténtes de sede *

et exaltávit húmiles;

esuriéntes implévit bonis *

et dívites dimísit inánes.

Suscépit Israel púerum suum, *

recordátus misericórdiæ,

sicut locútus est ad patres nostros, *

Abraham et sémini eius in sǽcula.

Glória Patri et Fílio *

et Spirítui Sancto,

sicut erat in princípio et nunc et semper *

et in sǽcula sæculórum. Amen.

Ad Magnificat, ant. Ecce ángelus Dómini appáret in somnis Ioseph dicens: Surge et áccipe púerum et matrem eius et fuge in Ægýptum et esto ibi, usque dum dicam tibi.

PRECES

Fílium Dei vivi, qui fílius humánæ famíliæ fíeri dignátus est, adorémus, ipsi confiténtes:

Tu es, Dómine, exémplar et salvátor ómnium.

Christe, per mystérium subiectiónis tuæ erga Maríam et Ioseph,

doce omnes reveréntiam et obœdiéntiam erga eos qui legítime præsunt.

Tu es, Dómine, exémplar et salvátor ómnium.

Qui paréntes amásti et ab ipsis amátus es,

omnes famílias in pace et mútua caritáte constítue.

Tu es, Dómine, exémplar et salvátor ómnium.

Tu, qui studiósus fuísti eórum, quæ tui sunt Patris,

præsta ut in omni domo Deus honorétur.

Tu es, Dómine, exémplar et salvátor ómnium.

Christe, qui ab ánxiis paréntibus tértia die in domo Patris invéntus es,

doce omnes quǽrere primum regnum Dei.

Tu es, Dómine, exémplar et salvátor ómnium.

Christe, qui Maríam et Ioseph tecum in cælésti glória consociásti,

admítte defúnctos in famíliam beatórum.

Tu es, Dómine, exémplar et salvátor ómnium.

Pater noster, qui es in cælis,
sanctificétur nomen tuum;
advéniat regnum tuum;
fiat volúntas tua, sicut in cælo et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

ORATIO

Deus, qui præclára nobis sanctæ Famíliæ dignátus es exémpla præbére, concéde propítius, ut, domésticis virtútibus caritatísque vínculis illam sectántes, in lætítia domus tuæ prǽmiis fruámur ætérnis. Per Dóminum nostrum Iesum Christum, Fílium tuum, qui tecum vivit et regnat in unitáte Spíritus Sancti, Deus, per ómnia sǽcula sæculórum.

Amen.

Absente sacerdote vel diacono, et in recitatione a solo, sic concluditur:

Dóminus nos benedícat,
et ab omni malo deféndat
et ad vitam perdúcat ætérnam.

Amen.

Text © LIBRERIA EDITRICE VATICANA.

© 1999-2024 J. Vidéky